Intervista ma’ Geert Kessels, Maniġer tal-Proġett f’EUROCLIO, l-Assoċjazzjoni Ewropea tal-Edukaturi tal-Istorja
EUROCLIO, l-Assoċjazzjoni Ewropea tal-Edukaturi tal-Istorja, waħda mill-‘ħbieb tal-eTwinning'li toffri taħriġ u seminars għall-għalliema tal-Istorja fuq livell Ewropew. Reċentement iltqajna mal-Maniġer tal-Proġett Geert Kessels u staqsejnih xi mistoqsijiet dwar il-pjattaforma ta’ EUROCLIO.
X’inhu l-valur miżjud għall-membri ta’ EUROCLIO?
Il-valur miżjud prinċipali ta’ EUROCLIO huwa relatat ma’ opportunitajiet ta’ taħriġ/seminars li noffru. Biex wieħed ikun parti minnha jista’ japplika għal għotjiet individwali tal-Grundtvig. Aħna l-unika pjattaforma fuq livell Ewropew li noffru taħriġ u seminars li jlaqqgħu flimkien lill-għalliema tal-Istorja biex ikunu jistgħu jaqsmu u jiddiskutu wiċċ imb wiċċ.
Il-parti l-kbira tal-membri tagħna huma organizzazzjonijiet tal-għalliema tal-Istorja. Għalhekk, jekk l-għalliema tal-Istorja jixtiequ jkunu jafu aktar dwar EUROCLIO għandhom jagħmlu kuntatt mal-assoċjazzjoni nazzjonali tagħhom jew jiċċekkjaw il-websajt tagħna .
Tista’ tagħtina eżempju ta’ attività reċenti ta’ suċċess immexxija minn EUROCLIO?
Ilna organizzazzjoni bbażata fuq proġetti għal 20 sena, għalhekk għandna firxa wiesgħa ta’ proġetti. Iżda reċentement ħdimna mill-qrib ma’ pajjiżi tal-Ewropa tal-Lvant u l-Balkani biex nintegraw metodoloġiji ġodda fil-kurrikulu. Il-proċess huwa biex niġbru għalliema mill-oqsma kkonċernati biex jaħdmu b’koperazzjoni fuq korsijiet komuni tal-istorja.
Għadkom kemm nedejtu portal bl-isem Historiana. Tista’ tgħidilna aktar dwaru?
Il-websajt toffri l-ewwel soluzzjoni alternattiva għall-idea ta’ Ktieb Akkademiku tal-Istorja Ewropea. Jieħdu sehem tletin pajjiż mill-Ewropa u lil hinn. L-għalliema jistgħu jiżviluppaw u jtellgħuh materjal ġdid; imbagħad il-bord editorjali magħmul minn għalliema u esperti jevalwaw il-materjal u jiddeċiedu jekk huwiex siewi li jiġi ppubblikat.
Fi klima ta’ sentimenti dejjem jiżdiedu ta’ nazzjonaliżmu fl-Ewropa, il-promozzjoni ta’ rikonoxximent kritiku u rispett reċiproku isir kruċjali. X’inhi l-opinjoni ta’ EUROCLIO dwar din ix-xejra?
Il-ġlieda kontra l-qawmien tan-nazzjonaliżmu hija waħda mill-għanijiet prinċipali tagħna. Il-koperazzjoni tagħmilha possibbli nilqgħu kontra l-isterjotipi. B’hekk il-kollaborazzjoni tal-għalliema mill-istess qasam huwa fundamentali.
Dan l-approċċ għandu jiġi applikat kemm jista’ jkun f’pajjiżi li għadhom kemm ħarġu minn kunflitt (il-Balkani, il-Kawkasu) kif ukoll għal pajjiżi tal-Lvant. Historiana hija waħda mill-għodod li tista’ tintuża b’dan il-mod. L-eTwinning qiegħed jiġġieled kontra l-qawmien tal-estremiżmu billi joffri pjattaforma għad-diskussjoni u l-qsim. L-eTwinning joħroġ lill-istudenti mill-isfera nazzjonali tagħhom. B’hekk jarrikkixxi l-għarfien tagħhom.
L-eTwinning joffri alleanza naturali bejn l-għalliema tal-Istorja minn madwar l-Ewropa. Permezz tal-għodod ta’ komunikazzjoni u l-opportunitajiet tan-netwerks soċjali tal-eTwinning, u l-abbundanza ta’ riżorsi offruti minn EUROCLIO, l-għalliema tal-Istorja jistgħu jsibu bażi komuni biex jikkomunikaw u jibnu proġetti flimkien. Dan ovvjament mhuwiex ristrett għall-għalliema tal-Istorja biss, għalliema oħra li qed ifittxu temi ta’ interess storiku jistgħu wkoll jibbenefikaw mir-riżorsi offruti minn EUROCLIO.
l-eTwinning