L-eTwinning u t-Tagħlim tal-Lingwi

Ria de Wilde, mill-Belġju u Marina Marino, mill-Italja huma t-tnejn għalliema tal-Franċiż bħala t-tieni lingwa u t-tnejn jintegraw l-eTwinning fil-lezzjonijiet tagħhom. Bħalissa qed jaħdmu flimkien fuq żewġ proġetti ta' l-eTwinning:

• L’école idéale dans l´Europe de demain
• Planète @dos

L-għan ta' dawn il-proġetti huwa li jistabilixxu rabtiet bejn l-istudenti tas-sekondarja mill-Belġju u mill-Italja u jgħinuhom jużaw lingwa barranija fi sfond awtentiku. Biex jagħmlu dan, għamlu użu intensiv t'għodod bħall-wikis, podcasting u blogs u wżaw it-TwinSpace biex jiġbru u jorganizzaw il-materjal u l-links marbuta mal-proġetti.

INTERVISTA

Ejja niltaqgħu ma' dawn iż-żewġ għalliema entużjasti u nsiru nafu aktar dwar dak li qed jagħmlu bl-eTwinning. Hawn ser issibu intervista ma' Ria, u fuq il-Blog ta' l-Għalliema ta' l-eTwinning (bil-Franċiż) tistgħu taqraw dak li kellha xi tgħid Marina dwar l-eTwinning.

Kif iltqajtu? Kif kontu tafu li l-għalliema li ltqajtu magħha kienet sieħba tajba?
Jiena u Marina ltqajna fil-konferenza ta' l-eTwinning f'Linz fl-2006. Tkellimna ħafna allura kont naf li kellna studenti ta' l-istess etajiet u li konna nagħmlu użu ta' l-ICT bl-istess mod. F'Linz tajna l-indirizzi ta' l-email u xi informazzjoni dwar l-iskejjel tagħna lil xulxin. Wara l-konferenza ikkuntattjajt lil Marina u staqsejtha jekk kenitx għadha interessata li tibda proġett miegħi. Hija persuna mimlija entużjażmu u l-kooperazzjoni bejnietna ħadmet tajjeb sa mill-bidu nett.

Kif fthiemtu fuq it-topiks tal-proġetti tagħkom u dwar il-metodi ta' xogħol?
Nilkkomunikaw bl-iSkype b'mod regolari, mill-anqas darbtejn fil-ġimgħa. Xi drabi nipproponi topik jiena u drabi oħra tipproponi wieħed Marina. Nippruvaw naħdmu fuq suġġetti li s-soltu naħdmu fuqhom waħedna. L-eTwinning joħloq l-interazzjoni bejn l-istudenti biex b'hekk ikunu jistgħu jiskopru aspetti oħra tat-topik magħżul.  

Diġa kontu ħdimtu fuq proġetti oħra ta' l-eTwinning qabel ma bdejtu taħdmu flimkien. Tħossu li l-proġetti tagħkom qed jitjiebu? X'tgħallimtu mill-esperjenza tagħkom fl-eTwinning?
Żgur li hemm evoluzzjoni fil-proġetti ta' l-eTwinning tagħna. Fil-bidu kienu msejsa l-aktar fuq skambju t'informazzjoni. L-istudenti fil-pajjiżi rispettivi tagħhom iddeskrivew dak li kien qed jiġri fil-pajjiż, u l-imsieħba setgħu jaqraw l-informazzjoni imma m'għamlu xejn biha. Ftit ftit rajna li pedagoġikament, kien aktar interessanti li nħeġġu aktar inteazzjoni bejn l-istudenti u fittixna attivitajiet li bihom setgħu jaħdmu flimkien.

Fil-proġetti tagħmlu użu intensiv t'għodod ta' l-ICT bħal m'huma blogs, wikis u podcasts. X'inhuma r-raġunijiet għal dan? Kif jgħinu fit-tagħlim tal-lingwi barranin?
Meta studenti jitgħallmu lingwa barranija jridu jitgħallmu l-vokabolarju u l-grammatika, imma mhux biss. Biex jipprattikaw u jtejbu l-kompetenzi - il-qari, l-kitba, s-smiegħ u t-taħdit - l-għalliema jistgħu jużaw għodod ta' l-ICT li jippermettu l-kommunikazzjoni orali u miktuba. L-istudenti jridu jikkomunikaw f'sitwazzjonijiet reali ma' sħabhom Ewropej u ma jistgħux jużaw il-lingwa nattiva.

Il-fatt li qed taħdem ma' klassi minn pajjiż ieħor kif ibiddel il-lezzjonijiet?
Il-lezzjonijiet isiru aktar dinamiċi. L-esperjenza tal-kommunikazzjoni reali hija pożittiva ħafna għal kulħadd: l-għalliema u l-istudenti. Xi drabi aħna l-għalliema nissottovalutaw ir-rwol li għandna f'ħajjet iż-żgħażagħ. Għandna l-possibiltà li niftħulhom moħħhom biex jaħsbu bħala Ewropej!

L-esperjenza tagħkom fl-eTwinning għenitkom f'xi proġetti oħra ta' l-iskola? Kif?
L-iskola tagħna tixtieq tibda proġett Comenius bl-isem “The Quest for the European Grail”. Ser nużaw il-logħob għat-tagħlim biex nimmotivaw aktar lill-istudenti tagħna. Ir-raġuni ewlenija għal dan il-proġett hija l-kooperazzjoni internazzjonali u biex ninvolvu aktar studenti u għalliema fi sħubijiet Ewropej. Ix-xogħol f'timijiet huwa importanti ħafna mhux biss ġewwa l-iskola imma anki ma' l-imsieħba tagħna mill-Polonja, n-Norveġja u l-Bulgarija. Iltqajna f'diversi Workshops għall-iżvilupp Professjonali ta' l-eTwinning u fil-Konferenza ta' Linz fl-2006. Ser nużaw l-esperjenza li ksibna mill-eTwinning l-iżjed minħabba l-għodod li nistgħu nużaw, irridu nużaw il-wikis u l-podcasting. Ser nirreġistraw il-proġett fl-eTwinning ukoll u nużaw l-għodod li toffri din il-pjattaforma.

X'jaħsbu dwar leTwinning l-istudenti tiegħek?
L-istudenti jħobbu jitgħallmu b'dan il-mod. Ma jħossux li jkunu qegħdin jaħdmu ħafna; madankollu jkollhom x'jagħmlu l-ħin kollu u jużaw il-lingwa barranija b'mod naturali. Itejbu l-ħiliet tal-lingwa u ta' l-ICT.

Mistoqsija ipotetika - x'timmissja l-aktar li kieku ma stajtx tuża l-eTwnning fil-lezzjonijiet?
Naħseb li t-tagħlim ikun tad-dwejjaq għalija. Ma nistax nimmaġina kif inkun mingħajr l-eTwinning. Issa l-proġett ta' l-eTwinning sar parti minn kull lezzjoni tiegħi. Hija sfida kbira li taħdem m'għalliema oħra Ewropej u li toħroġ b'metodi ġodda biex tgħallem lingwa. Għaldaqstant kieku nimmissja dawn l-isfidu u l-kuntatti li nagħmel fix-xogħol tiegħi ta' kuljum.

Editur tal-Web: Christina Crawley Ippubblikat: 02.09.2008 Mibdul l-aħħar: 24.11.2009